جنحك اخذني

عضو لامع تاريخ التسجيل : 20/12/2010

ريشه بوسط ريشات جنحك اخذني
وبرض السماوه هناك ياطير ذبني
****
رﭽـفه وطحت للـﮔـاع هزتني الاشواﮒ
لرض السماوه الروح والـﮔـلب مشتاﮒ

****
هـم ابكبـر دنياك هـم السماوه
خلّصت عمري وياه دوم انتلاوه
*****
لرض السماوه جـروح بـﮔـيبي عـﭽـله
للشـرجي والمـشواچ وارض السـكـله
*****

ما ينوصـف ياناس هـم العليه
ﭽـي عفت آنه احباب بالحيدريه

****
هالليله دمـع العـين عـمدن لوشله
حـن الدليل اشتاﮒ لرضـچ يقشله
****
انخـه الله يا هالناس بالنبي وآلـه
ارجـع واشـم زهـور حي الرساله
****
حـط الـﮔـلب يا طير بجناحك وطير
وبس ساعـه وﭽـر بيه بم العصافير
****
رفرف بـﮔـلبي وطير ، خلني بمـﭽـاني
وذبه انته ساعـه هـناك يم ﮔـاع باني
****
حيل ارد ادﮒ عالراس خلوني ابجي
صاعـد بـﮔـلبي الشوﮒ لـﮔـاعك يشرجي
****
بجاه الله والكرار والحر والاكبر
لرض السماوه انعود مارايد اكثر
****
اهـل الكرم والطيب اهل المحنه
بالشده جرب شوف اهل المثنى
****
للشرجي واهله البيه واهل الكرامه
صار بسويد احشاي الهم علامه
****
للغربي والدبات والحيدريه
ﮔـامـت توج النار هالساعه بيه
****
للغربي لو رديت بخير وسلامه
عمدن لصب ادموع يم الكرامه
****
اطبج نهاري وياه لو ليلي ﮔـصّر
الطم وانوح عليك ياجسـر الأخضـر

****
ناذر نذر ياناس وشاهدي الساده
ارﮔـص لون رديت يم العياده
****
ارد انخه آنه الناس من اهل الولايه
تبوسلي وبحيطان عـجـد العرايه
****
بجاهـك يباب الجـود جعفـر الصادق
روحي ترد فـد يـوم لعـجـد الفنادق
****
لشخصك يداحي الباب اشـكي الهظايم
هم ترد عيني اتشوف ﮔـاع اهل ناظم
****
روحي اصبحت ياناس تكسر الخاطر
مشتهيه غبشه اتظوﮒ شوربة مسافر
****
ياهو اليـﮔـول بعيد عن السماوه
هذا آنه بالاحلام اسبح بساوه
****
لحد يـﮔـلي اشبيك من اﮔـعـد ابـﭽـي
حمل ارد اذب هموم يم الشكرﭽـي
****
بالغـسل والبستان عونه الـﮔـعد يوم
وبين النخل ياناس فرغهه الهموم
****
كل الشباب هناك ملتمه صوبين
ياهو التريده اتشوف بـﮔـازينة حسين
****
حـﮔـه اليحن ياناس بالحسره يشحط
جنـه وتـﮔـول هناك بالقشله عالشط
****
مختاضه روحي وياي والـﮔـلب مختاض
ﭽـين اشتهيت اليوم كبة ابو رياض
****
جرحي يطيب بساع تنخمد ناره
بالاخص لو رديت يم التجاره
****
للسكك هزني الشـوﮒ وچ ناره بيـه
وخلاهه كـوره تـﮔـول هاي المسيه
****
ﭽـن جنه عيني اتشوف والحوري اتطير
اشمحلاهه من تفوت بسـوﮒ النجاجير
****
لجسر الخشب مشتاﮒ ولدوبته النوب
مشتهي ﮔـعـده هناك وي خيط الغروب
****
تسوه الهند والصين والغرب كله
شمحلاهه من اتفوت بسوﮒ السـكله
****
يرﮔـص دليلي اليوم والعـﮔـل ﭽـن خف
ﭽـي هزته الاشواﮒ لسوﮒ المسـﮔـف
****
يالغربي هاي الروح عـتتني الك عـت
وانـﮔـر تـد ﮒ تريد يم ابو الشربت
****
جـنه الرميثه اتـﮔـول مامش مثلهه
فايز وحـﮒ عيناك من يرجع الهه
****
روحي آنه للأحزان صارت وريثه
من فارﮔـت ياناس ﮔـاع الرميثه
****
لكل كتر منهه اشتاﮒ لافشله لا عـيب
ماﭽـذبت مشتاﮒ لسوﮒ الـﮔـصاصيب
****
نعلعله ابو صدام نعلعله عـفـلـق
حـرّموا عيني اتشوف جسـر المعـلق
****
ﮔـلبي حمامة شـوﮒ وبشوﮔـه هايم
كـوّن يريد ايـبات عـد الظـوالـم
****
النخل السماوه اشتاﮒ صبح ومسيه
هـم نـرد نــﮔـعـد يـوم باليهـوديه
****
للمجد والوركاء والخضر آنه
وﮔـاع الرميثه ااشتاﮒ ودرب الحضانه
****
رفرف جناح الشوﮒ ماخـذني بيده
ياكل كباب ايريد ابمطعم عبيده
****
ﮔـص رايد بعشتار بيه العوافي
يادهر كافي افراﮒ يادهر كافي
****
روحي وشيعه الشـوﮒ خلبصهه خلبوص
ﭽـين اشتهـت هاليوم سمـﭽـات حلبوص
****
ياطير اخذ وياك ﮔـلبي وديعه
وبالغربي ذبه هناك يم الطليعه
****
صـبّحت روحي اليوم تضحك سعـيده
ﭽي حـدرت بالطيف يم الجديـّده
****
شـوﮔـي آنـه من جبال طاح وتدربه
للقشله للبستان يم عبد ربه

تحياتي

موضوع: رد: جنحك اخذني 2/17/2011, 16:18

مساء الخير

شكرا على الطرح

جميل

هكذا الدنيا تسير

موضوع: رد: جنحك اخذني 2/17/2011, 18:12

جميلة جدا استاذ يوسف شكرا لك

عضوماسي تاريخ التسجيل : 30/08/2010

جميل جدا -اعذب الكلام

عضو لامع تاريخ التسجيل : 20/12/2010

اشكر مروكم نورت الصفحة بكلماتكم

موضوع: رد: جنحك اخذني 2/22/2011, 12:52

كلمات جميلة
بارك الله فيك وجزاك الله خيرا