يكفي حبيبي

زعلان لكن اعرف شلون اراضيك
ما احد غيري يعرف بطبع خلي

اعرف اذا مني تضايقت و اشفيك؟
ما عاش من زعّـل حبيبي و دلي

من نظرتك ... من هيئتك ... من تعـاليك
اقرأ ملامح ضيقتك ... لا تقل لي

ادري علي زعلان لكن اواريك
شلون ترضى يا بعد كل من لي

ملح الحياة اني اضمك و اخليك
وش هي الحياة بدون جد و تسلي؟

ساعات لي خاطر اجيبك و وديك
وارفع حرارة حبنا بالتغلي

اقول ما حبك و ما ابيك ..ما بيك
عشان اغيضك بس و افشي بــ غلـّي

بس الحقيقة اني اهواك و اشريك
و محبتي لك ما بعد منها تخلي

ودي احطك وسط عيني و اغطيك
عشان ما تبعد عن العين ملي

لو غاب حسك نبض قلبي يناديك
اشتاق لك بالحيل يا بعد كلي

اسهر انا و الشوق دايم بطاريك
افكارنا ما بين ربطــ ( ن ) و حلّ ِ

زعلان مني ؟.. كل كلي يراضيك
ما حد غيري عارف بطبع خلي

يالله تبسم يا ذبحني تغليك
يكفي حبيبي (كشح وجه ) و تغلي