الا
الانتخابات نزيهة والا وجيهة حتفرق ايه يعني ؟
بقلم محسن الصفار
بعد انتهاء الانتخابات في مصر وسط جدل عميق بين المعارضة والموالاة حول شرعية الانتخابات واتهامات من المعارضة للحكومة بتزوير النتائج واستهداف المرشحين, فاز الحزب الوطني الحاكم بكل المقاعد تقريبا في مجلس الشعب المصري .
ولإستيضاح هذا الموضوع التقت أذاعة صوت الخيال باحد كبار المسؤولين عن العملية الانتخابية للاطلاع منه على وقائع الانتخابات :
المراسل : اهلا بك سيادة المسؤول, و أول سؤال لنا هو هل تعتبر ان الانتخابات كانت نزيهة ؟
المسؤول : شوف حضرتك الحكومة كانت حريصة على ان الانتخابات تكون نزيهة بس لما دورنا على نزيهة لقيناها ياحبة عيني تجوزت وبقى عندها 3 عيال !!
المراسل : جميل , وبعد ؟
المسؤول : قلنا ألأمر لله من قبل ومن بعد بلاها نزيهة نجيب سليمة ونخلي الانتخابات سليمة لقينها هي الاخرى تجوزت فقلنا ندور على واحدة ثانية
المراسل : طيب من الأخر لو سمحت .
المسؤول : مش حأطول عليك فضلنا ندور بين سليمة لنزيهة لكريمة لوجيهة , واخرها مالقيناش غير عقيمة هي اللي لسة عانس وماتجوزتش فتوكلنا على الله وعملناها انتخابات عقيمة وبعدين ايه التمسك الغريب ده بالاسماء ؟ نزيهة , نزيهة ؟ سيبك من الاسماء وخليك بالافعال واهي انتخابات والسلام .
المراسل : جميل والله , هناك اتهامات بان رجال الشرطة اعتدوا على المرشحين والناخبين بالضرب فهل هذا صحيح ؟
المسؤول : وانت برضه تصدق الكلام الفاضي ده ياراجل ؟ همة العساكر بتوع الداخلية يعرفوا يضربوا حد ؟ دول موكوسين, وكل واحد فيهم يجي الشغل ومراته ضارباه علقة من اللي هي هي ويعقد في قسم الشرطة يعيط ياحبة عيني ووزير الداخلية كل يوم رايح يصالح واحد على مراته وياخذ منها تعهد انها ماتمدش ايدها عليه !! .
المراسل : أذا حضرتك تنفي تماما وجود اي نوع من انواع الضرب ؟
المسؤول : ابدا وحياتك انت !! ده حتى سيادة الوزير مانع ان عناصر الداخلية يتعلم اي واحد فيهم جدول الضرب !! علشان كده كلهم ساقطين اول ابتدائي , آه والله وكل ده اشاعات مغرضة للنيل من رجال الداخلية الشرفاء الحنيين الرقيقين .
المراسل :خلاص ياسيدي فمن كلامك يبدو لي ان رجال الداخلية يصلحون للتعليم في رياض الاطفال , طيب ماقولك باتهام المعارضة لكم بتزوير النتائج ؟
المسؤول : انا شاكر لحضرتك السؤال الجميل ده , شوف لما انت تروح تشتري عربية حتاخذ مين معاك ؟ ميكانيكي والا جزار والا طبيب جراح ؟
المراسل : ميكانيكي طبعا لأنه يفهم في السيارات
المسؤول : عليك نور ياحبيبي طيب دي عربية لا راحت ولا جت, وده مجلس الشعب على سن ورمح فلما نيجي نقرر من يصلح لعضوية مجلس الشعب حنسمح لعطوة الجزار وبيلية الميكانيكي وسليمة الشغالة اللي مايفهموش في السياسة انهم يقرروا من حيبقى نائب في البارلمان ؟ دي حتى تبقى خيانة للشعب والوطن والدستور .
المراسل : وكيف اذا يتم الانتخاب ؟
المسؤول : احنا نجيب الناس اللي بتفهم وعندها خبرة مثلا عناصر المخابرات علشان مايسمحوش باختراق المجلس امنيا وعناصر الحزب الحاكم علشان ماتتفرقش كلمة الامة ورجال الاعمال اللي ماسكين اقتصاد البلد من زمارة رقبته ودول يعملوا قعدة كدة على مزاج ويقرروا من يفوز ومين يخسر وبكده نمنع وصول الانتهازيين والحثالات للمجلس الموقر .
مافيش لا تزوير ولا اي حاجة من اللي بتقوله ده اسمه تحرير يعني المواطن يبقى زي الكاتب يحط في الورقة الانتخابية اللي هو عاوزه بكل حرية وشفافية من غير ضغط , واحنا عاملين زي المصحح في الجريدة نصحح له اخطائه ودي خدمة مجانية وفي سبيل الله .
المراسل : ولكن الا تعتقد أن التغيير سنة الحياة ؟
المسؤول : نعم بكل تأكيد
المراسل : ولم ترفضون اي تغيير اذا ؟
المسؤول : لأننا فرض مش سنة !!
المراسل : شكرا لك سيدي المسؤول وكل انتخابات وانتم بخير .
* هذه القصة واحداثها وشخصياتها من وحي الخيال ولاتمت للواقع الديموقراطي العربي المزدهر بأي صلة لا من قريب ولا من بعيد !!!
الرئيسية
البوابة
التسجيل
دخول
