لا تعتبي يمّا
عالمحرمة بكتبلك عيوني
وببعت لك اياها مع العصفور
ولو تعرفي قديش إحنا صحاب
وكل ما يقرب صبحنا يطلع
ييجي يقوللي هات مكتوبك
إمك عباب الدار تستنا
يا اللـه يا فارس
بعلّق على الريشات محرمتك.. وبنضحّك.0
عم تسأليني ليش.؟
عُمرك سمعتي ناس بتهرّب حروف.؟
يمكن حروف رصاص..؟ مش عارف.!
هيك البطل أسعد كان يقول
لا تشغلي بالك وبتعرفيني بحب أحكي كتير
هون يمّا كلنا جوا الأسر أخوات
بناكل سوا بنحكي سوا
وبنام عا بكير ما بنسهر
وقبل الصبح بنفيق نفتش.. ونسأل
مين من بيناتنا ناقص.؟
مرة بكون أحمد..
مرة بكون عيسى.. وما بنزعل
بنعرف لوين أخدوه
وبنعرف كمان لما بيرجع
رح نشوفه بعيونا أكبر
أسعد رجع يمّا
غاب عنا كتير
وكل يوم كنا ننطره ونقول
ها يا ولاد: بكرة رح يرجع
بنكتب على الحيطة، تحت كلمة قدسنا بترجع
وأسعد رح يرجع
وفـ يوم قبل غياب الشمس بشويه..!
بتسأليني كيف عرفتها بتغيب.؟
شو نسيتِ
مش قلت لك صاحبي بنام بالطاقة
ومتلك.. بطير كل صبحية
يهدّي على فراشي
ويهزّني ويقول قوم طلع الضوّ
وعند المسا بيرجع
بسمع كمان من خفق جنحاته
إنه الشمس غابت
إيش كنا عم نحكي
آه .. اليوم كان الغدا شوية رز.. وتفاحة
شايفة هالعزّ؟
لا تسألي عني يمّا كتير، ولا تخافي
ولا تتعبي وتيجي تزوريني
بعرفك رح تتركي وراك صغار، إخواتي
وبعرف كمان وين بيروحوا
عالحاجز الغربي يلمّوا حجار
بس لا تبكي
وبعرف بإنه دموعك سخيّة
بس مشتهي وحياة شيباتك
وحياة ثوبك المليان تطريزات
وجواه تلات ألوان
ومرشوق بالنجمات
مشتهي يمّا ريحة شجر زيتون ضيعتنا
بتهفّ كل ما مسكت من إيدك لفلوفة الزعتر
أسعد رجع
جابوه مسوية وقالولنا هادا بطلكم..!؟
كان عم يضحك
ومسبّل عيونه وعم يضحك.!0
وإيديه متل التلج
قاللي:0
يمكن سمعته عم بيقول
ولا يهمك
شوف اللي جابوني قديش مقهورين
وهيّاتني رجعت.. وعم بضحك
ووصاني.
قاللي يا فارس قول لأمي
شجرة لزرعناها أنا وهيّ عباب الدار ضلّك اسقيها
ومن لحم صدري وحبة عيوني طعميها
وقللها تزرع حواليها شوية حبأ
كم يوم.. وبيكبر
وعغصونها تربط الحبلة وتعملها مرجيحة لإخواتي
إحنا مناح كتير يا يما
لا تسألي عني
ولا تقولي كيف عم بنعيش
هون يمّا عنا مدرسة واقلام وشوية ورق
لا تسالي من وين
بنكتب قصايد وعم نغنيها
أنا صحيح يمّا انحبست صغير
بس وحياتك
كل يوم عم بكبر
وبيكبر العصفور
وتقوى جناحاته
بتصدقي يمّا
إحنا اللي محبوسين لا بد يوم بشي يوم مسوية
لمن يجي العصفور
وبنقول هيّاته رجع
وإحنا كمان متل البطل أسعد
في يوم مهما طال
رح نرجع..
راقت لي , تذكرني بذكرى , من كتبها لا أعلم
الرئيسية
البوابة
التسجيل
دخول
