دكتورة.م انوار صفار
Admin
تاريخ التسجيل : 04/04/2010
البلد /المدينة : bahrain
بطاقة الشخصية
المجلة:
 | | موضوع: بالخطوات-مراحل البناء 3/14/2015, 20:04 | |
| علما ان المدونة مقسمة الى التالي1- طريقة احتساب البناء 2- بناء الهيكل3- التشطيبات النهائية للمنزل4- تسلسل العمل ---------------------------------------------------------------------------------الجزء الاول : طريقة احتساب المتر بناء عند المقاولين والشركات الحالية :
تعتمد على السقف مال البيت تكدر تحسبها عن طريق الخريطة مالتك انتبه لما ياتي
1- البلكونات - تحسب نصف ذرعة يعني اشكد تطلع تقسيم اثنين
2- ستارات السطح والمنور الداخلي مجانية على ان لايزيد المنور عن 6 متر بعض الشركات والمقاولوين يحسبون المنور نصف ذرعة وهذا غير شائع
3- الاسيجة الخارجية للمنزل تحتسب لكل اربع امتار طول يعتبر متر بناء ( وهذا لتغطية تكاليف الكراج )
الخطوة الاولى قبل البناء
عمل خريطة حقيقة للارض - تاخذ الابعاد الحقيقية على الارض ( عادتا الى موجود بخريطة الامانة لا ينطبق على الارض) او اطلع مساح ثم عمل خريطة للبناء والالتزام بها .
انتبه لما ياتي :
1- الفيتة من نوع كتان لا يعتمد عليها في الاحتساب ( لان قابلة للمط) ينصح باستخدام فيتة حديد مو العادية وانما الكبيرة ام 20 متر
2- المساح الي يشتغل بفيتة احتمال يخطء يفضل استخدام جهاز اسمة توتل استيشن ويعطيك الخريطة على شكل اوتو كاد ومطبوعة
3- تكلفة المساح 100 دولار وتقسم على جميع المشاركين بالارض  
------------------------------------------------------------------------------------
الجزء الثاني - بناء الهيكل • يتم تنضيف الارض بشكل كامل من اي انقاض ثم يستخدم السبيس مع ( الجلمود اختياري على طبيعة الارض) مع حادلة قبل البدء بعملية صب الاساسات• الاسس وهنالك ثلاثة انواع اختر الي تناسبك وانتبه لطبيعة التربة مال المنطقة مالتك :
1-الاولى حفر اسس بقياسات 70*80 سم مسلح او 60*60 او 60*70 او 50*60 ثم عمل صبة من الداخل بضمنها بواري المجاري من نوع الشريف المصري
2- الثانية عمل الاساس بشكل حصيري على مساحة القطعة صب كامل بضمنها المجاري نوع الشريف المصري 4 انج او 6 انج و المنهولات صب ( يعني اتسوي صبة كاملة حصيرية على مساحة الارض وبعدين تبني فوكها)
3- الثالثة بعد حدل الارض جيدا يتم عمل رباطات صب بارتفاع 40 سم على جميع محيط الغرف حسب الخريطة ثم عمل صبة من الداخل بضمنها بواري المجاري من نوع الشريف المصري مواصفات المجاري اتكون كالتالي
المنهولات صب وليس بناء
نقاط صب على طول البوري وتسليط مضبوط ودفن سبيس ثم فوكها الصبة - طريقة فحص المجاري كالتالي:
اتذب سطلة مي باخر منهول بالبيت واتشوف مسيرة الماء بالبوري وصول الى المنهول الرئيسي والشارع - نوعية الغطاء للمنهول - انصح باستخدام المنهول البلاستيكي المضغوط - المصري تحديدا حيث يتحمل الضغوط العالية - طريقة العمل بعد صب القاعدة مال الغطاء وية المنهول انصح بوضع دهن اكريز داير ما داير الغطاء من الداخل والخارج قبل غلق المنهول البلاستيكي - علمود مستقبلا من تجي تفتح الغطاء مو يعصة وتظطر اتفلش المنهول هاي نصيحة .
نصيحة اخرى للمجاري - هو غلق المنافذ مال المجاري عند البناء باكياس كارتون او كونية زينة وسد الاغطية ايضا - علمود بمراحل البناء القادمة مو تعصة طابوكة لو احد العمال ايذب اسمنت او جص بالمجاري وبعدين تنسد وتظطر هم اتفلش - احذر من هاي
اغطية المنهول - او نقاط التصريف في الحمامات والمناور و الكراجات انصح بالنوع البلاستيكي وليس الاستيل - لان الاستيل مهما كانت نوعيته سيتفاعل مع الماء مستقبلا ويصير لونة اسود
ملاحظة : اتحط لايلون نوعية جيدة فوق السبيس قبل الصب لعزل الاملاح عن الصب الرئيسي مال الارض للبيت كلة
الابلون هم انواع اختر الي يناسبك اكو سمك 1.5 واكو 2.5
ورة ما يكمل الاساس وفق الطريقة الي اختاريتها
• التسليح للسقف مسلح بابعاد 15*15سم لا تقبل اقل من هيجي
•الرباط المحيط للبيت بالكامل فوق الجدران الى السقف 40سم او ممكن فوق الشبابيك فقط بالاضافة الى اجنحة 50 سم مو مشكلة
• سمك صب السقف من 15 الى 18سم ( العبرة مو بالسمك اهنا وانما بالتسليح بالنقطة السابقة )
•الطابوق للبناء جمهوري ( وطبعا لتموت ما تلكي طابوكة ما بيها ملح لاحد يغشك و نصيحة لا تستخدم الايراني لان اكو بيوت وكعت )
• الاسمنت نوع طاس لوجة
• الرمل مفحوص واذا اخيضر هم مو مشكلة بهاي المرحلة ( لان الطابوك كلة بي ملح فلا تعب روحك )
• الحصو مكسر
• الحديد اوكراني والحديد بسمك نص او ثلاث اتربع
• خطوط سبلت دفن ( بوري دفن 3 سم او 2 سم ) واتسويها حسب الخريطة مالتك بالقرب من الستارات مال البيت مو بنص السطح
• ارتفاع الطابق 3 متر
• يستخدم كلوردين في الاسس بغزارة
• وطبعا اتشبع اي صبة اتسويها بمراحل البناء بالماء و تتركها لمدة اسبوعين على الاقل قبل استكمال العمل 
• بعد اكمال الهيكل يفضل عمل خلطة من الماء والاسمنت المقاوم وترش كل الجدران من الداخل حتى تصبح لونها اسود مخضر - طبعا لمقاوة الرطوبة والاملاح بالمستقبل
-------------------------------------------------------------------------الجزء الثالث : التشطيبات النهائية للمنزل
1- الكهرباء
سيمنز سعودي او اردني درجة اولى دفن ( طبعا طريقة البواري ممنتازة والسيمنز جيدة جدا بس البواري اغلة ) – الفنش نوع الفا سعودي- الميزانيات نوع الترا سعودي – خطوط مستقلة للسبلت والسخان والفرن – الفنش يتضمن قاعدات الشمعات والهولدرات واضوية خارجية مغلفة بالاستك ( المتعارف عليها ) لكل البيت
2- الماء
• بلاستك دفن نوع PPR طريقة العمل نوع كوي – البوري نوع تركي مسلح – او امل الشريف المصري CPVC واهنا اتصير طريقة العمل صمغ نوع تانجيت امريكي
انتبه لنوع cvpc
هذا النوع يختلف عن pvc لانه مصنف لمقاومة الحرارة من الداخل ( المي حار ) والخارج ( الشمس ) لدرجات حرارة عالية حسب المواصفات التقنية وتكدر تبحث بكوكل عن الفرق. امل الشريف المصري الموجودبالسوك من نوع cvpc لذالك غالي شوية - عرفتو الفرق
• طبعا يفضل ان تسحب بوري الوطنية سمك 34 والبوري الصاعد للتانكي سمك 12 والنازل ايضا سمك 34 وهذا اشوية يصعد التكاليف
• البيت يعتمد بشكل اساسي على التانكي مع وجود نقطة للماء الوطني في الحمامات والمطبخ والمنور وفي الطابق الثاني وامام البيت (للمبردات)
• التانكي نوع الاصيل الاردني بلاستك (اربع طبقات ) الابيض ( ايسوي المي بارد بعز شهر اب على الاقل هاي تجربتي وياه هذا النوع ) السعر 215 الى 225 الف عراقي سعة 1200 لتر
3- الصحيات
• خلاطات الماء والحنفيات والدوش المستخدمة في البيت كلها نوع هاكسو التركي الاصلي (HAKSU) انتبه لان اكو تقليد امبين من الكارتونية مالتة صيني مو تركي ( كارتونة التركي اسود واحمر قاتم وامبنية تكمة )
• المغاسل والغربي نوع التركي او مصري – ابيض سادة حجم حوض المغسلة والغربي كبير
• سيت حمامات عدد 2
• شاور في الحمام الارضي و بانيو في الحمام طابق الثاني
• حمام الطابق الثاني يتضمن تاسيس للغسالة ( مجاري) مع خلاط
4- الارضيات قبل ما تشتغل الارضيات يجب تنضيف الصبة الداخلية بشكل جيد جدا من اي مواد صقطت عليها خصوصا اثناء عملية البياض
• الرمل المستخدم مفحوص ( مهم ان يكون هنا مفحوص ) 550 الف السكس يكفي مساحة 100 متر حسب الدفن
• ارضيات البيت من نوع كرانيت بسعر لايتعدى 17 دولار ( ممكن استبداله بنوعية اخرى ودفع الفرق للمتر)
• ازارة للطابق ارضي وثاني 10 سم نفس نوع الارضيات
• ارضيات الحمامات و السيراميك من نوع فيتنامي ( جوهرة المنصور) بسعر لا يتعدى 13 دولار للسيراميك و للارضيات
• سيراميك المطبخ نوع فيتنامي بسعر لا يتعدى 14 دولار ( جوهرة المنصور ) - ملاحظة جوهرة المنصور شركة جدا راقية دور عليها بكوكل - عدها مقرات عديدة في بغداد اذكر منها - المنصور - حي الجامعة مقابيل بسكلاتة - الفرع الثالث كراج الشرق الاوسط الخضراء
ملاحظة اني مقتنع بالفيتانمي والاسباني لكن هذا لايعني ان بقية الانواع غير جيدة بس احذرو الصيني والايراني والله اعلم .
المرمر الفيتامي
خلي اشرحلكم شنو قصة الارضيات والنوعيات الموجودة بالسوك حتى اتصير عدكم فكرة اوضح :
المرمر
نوع الحجر هو كلسي يعني من الطبيعة متكون اسمة الي دارج عدنا هو ايضا مرمر من صفات الحجر الكلسي التالي - قابلية للامتصاص عالية - عروك والوان مختلفة - بارد - فخم - ممكن اعادة جليه بالمستقبل الانواع الموجودة بالسوك حسب القوة والاسعار
الايطالي - هذا سعرة يعبر 60 دولار للمتر ويوصل لل 250 دولار
الفيتنامي - جيد جدا بسعر من 32 دولار الى 20 دولار
التركي - جيد - قابلية امتصاص عالية - من 20 الى 25 دولار واكو اغلة
العماني - الوان جميلة ومحدودة بسعر 22 دولار
الهندي والبكاستاني - طبعا اكو جدا غالية مثل الايطالي واكو الرخيض والفرق واضح
اشلون تعرف المرمر الزين هذا خوش سوال ؟ اجاوبكم من خلال تجربتي
1- المرم يباع وفق السمك مالتة يعني كلما اسمك كلما احسن الدارج بالسوك 2 سم ويطلع 1.8 وطبعا الايطالي 3 سم وانتبه للخلفة لان مراح يجي قياس واحد لان طبيعي مو صناعي
2- شوف ظهر المرم مالتك اذا بي شبكة للتسليح - هذا يعني ان هذا المرمر سهل التكسر فحاطين شبكة علمود يحموه
3- كلما زادت عروك المرمر يعني صار سهل التكسر تحت الضغوط العالية
4- مثل ما كلتلكم عيب المرمر ان بي قابلية للامتصاص السوائل - سوي فحص اخذ نموذج من البائع ولا تدفع افلوس ارجع للبيت حط المرمراية بالمطبخ و طك فوكها بيضة وحط ايضا شربت اصفر مثلا و حليب بمكانات مختلفة فوك النموذج مالتك - اتركها يوم او يومين تعال امسح البيض والشربت وشوف النموذج اشكد اتشرب بهاب المواد - اذا الاثر قليل هذا معناها هذا المرمر جيد جدا - اذا هوسة وطبعة قوية انصحك اتعوفة وجرب غير شي
الاختبار الثاني - على نفس النموذج جيب ادريل وازرف المرمر شوف الادريل بسهولة يفوت واذا فات هل المرمر اتكسر لو لا - اذا كانت النتائج مقبولة اتوكل على الله واشتري هذا النموذج
2- النوع الثاني من الارضيات هو المرمر الصناعي او ما يسمى عدنا بالكرانيت الصناعي
نوع الحجر بالاصل من النوع البركاني - يمتاز بقوة وصلابة وتحمل عالية
- قليل الامتصاص للسوائل - وبما انه صناعي راح تلكاه تقريبا متشابه
عيبة الوحيد بالعراق انه حار لانه حجر بركاني - وطبعا لا يمكن جليه بالمستقبل لانه صناعي هذا هم انواع ولو عندي وكت جانت سويت بي تقرير منفصل الكم - انتبه للسمك مالتة اذا كنت ترغب بالشراء و اللون مهم في تحديد السعر ايضا - المشمشي مالتة اغلى نوع بيهم
3- الكاشي - طبعا الكاشي هو هم انواع بس بشكل عام الكاشي هو صناعي يتكون من طبقتين يسموهن - ابيض و اسود وطبعا هاي نتيجه طبيعية للمكونات مال الخلاطات مالتة اسمنت اسود واسمنت ابيض - ليش يحطون هاي الخلاطات اهنا الجواب بسيط - الاسمن الابيض للتماسك والجمالية - الاسود علمود يمتزج مع الخلطة الاسمنتية الجواة عند العمل - السمك المتعارف عليه 3 سم الكاشي التركي في الطابق الثانيالانواع حسب البلد والخلاطات و السمك
العراقي - ابيض اسود - 3 سم - جيد اذا اخذتة من معمل ثقة
الايراني - جيد بسمك 2 الى 3 سم ابيض اسود
الاردني - جيد جدا ابيض اسود 3 سم
التركي - جيد جدا للطابق الثاني - نقشات رائعة - 2 سم - ابيض فقط 4- النوع الرابع من الارضيات - هو السيراميك - والبورسليين - والباركيات ( الارضيات الخشب )
طبعا هاي الارضيات لاينصح بها في البناء للبيوت لانها غير مقاومة للضغوط وغير عملية - ممكن استخدماها في امكن اخرى مثل المحلات او المطاعم ولكن ليس في البيوت حتى لو طابق ثاني
5- نوع الخامس هو المستخدم في الكراجات والمنور - طبعا هم اكو انواع
السراميك المضغوط - وطبعا هذا يباع على الضغط اكو 5 طن و 8 طن و 12 طن
اكو المقرنص - ما انصح بي
اكو الاردني من نوع اشتايكر - جيد جدا
اكو السيراميك الفيتامي جيد جدا
ممكن اتحط كرانيت بالكراج وهذا لا ينصح به - او كاشي اردني عادي وهذا جيد جدا
الي بصورة هو سيراميك 8 طن اسباني
[size]
اماكن الشراء للمرمر والكرانيت والكاشي و السيراميك والشتايكر الخارجي
شارع بسكلاته حي الجامعة - بهذا الشارع اكو فد سبع شركات محترمة بيها كل الخيارات الي تناسبك اكيد من ضمنهم وكيل تركي وو كيل اردني و شركة جوهرة المنصور للفيتامي - تكدر تشتري كلشي مناة
المكان الثاني - هو كراج يسموه كراج الشرق الاوسط - يوجد عند تقاطع العامرية خضراء - كراج الامانة سابقا - هذا بي فد 100 شركة للارضيات والصحيات
انتبه عند الشراء - الاسعار عادتا لا تتضمن اجور النقل الى بيتك - اجرة النقل بحدود 100 الف من مخازن الشركة الي عادتا ما تكون عند ساحة التبادل في ابو غريب - لا دوخ نفسك ابو شركة هو يرتبلك الامور
5- الشبابيك
الشبابيك نوع المنيوم سعودي مع فريم شخاطة ( طبعا الفريم شخاطة داير ما داير الشباك علمود من يجي الحداد يحط الكتايب الحديد ما يدمر الشباك والبياض اي مايحتاج يحفر شي بالحايط ) و بعدين الحم على الفريم هذا كتايب حديد ونقشة على ذوقك
الجام المستخدم مضلل سمك 4 ملم طريقة العمل سليكون والمعجون سوري او تركي
انتبه لما ياتي
الجام المضلل يستخدم للشبابيك المطلة على الشارع الخارجي فقط
الجام وبي نقشة يسمو نقشة بقلاوة يعني بيها نقشة من هاي الي ما يبين من وراها شي من الجهتين تستخدم للشبابيك المطلة على الجيران وفي الحمامات ( حفاظا على الجيران )
الجام العادي من دون اي لون يستخدم لشبايك والابواب الداخلية هذا الذوق البغدادي. وانتم احرار طبعا
6- الابواب
• الابواب الخارجية حديد جاهز نوع تركي يشبه الخشب ابو النقشة ( نوعية جيدة ) مع كتيبة حديد
• الابواب الداخلية نوع صاج شغل يد ( نرك 20سم ) من دون نقشة مع جرجوبة جاوي و قبغ للباب نوع صاج صيني وكيلونة تركي نوعية جيدة وصبغ صاج اشقر - وتوصي النجار انو نقشة البيبان كلها عرك واحد ( العرك المفضل يسموه ابو الفراشه ) الفراغ الي جوة الباب 1 سم الى الارض مو اكثر
• الابواب بارتفاع 2 متر لكل البيت وبعرض 1 متر ما عدا ابواب الحمامات بعرض 80 سم
7- الدرج
صب مع تغليف البايات بنفس نوع الارضيات بسمك 3 سم
المحجر المنيوم تركي او حديد تركي ابو النقشة [/size] [size]
8- البياض
العمل مساطر للجص والتشطيب يتضمن مساطر المنيوم للسقوف ( اربع غرف )
9- الصبغ
الصبغ المستخدم للحديد في جميع مرافق البيت بوية تركي
الصبغ المستخدم للبيت من الداخل تركي بلاستيكي نوع سلك كوت (silk coat) [/size] [size]
10- واجهة المنزل - اكو عدة انواع
1- لبخ و نثر مطعم زخارف شغل الفلوجة
لبخ البيت من الخلف والستارة من الداخل والمناور نثر 2- واجهات حجر ومطعم بمرمر او كرانيت او سيراميك
3- لبخ و طلس ومساطر المنيوم ثم صبغ بلاستيكي خارجي مثل ما بالصورة[/size] [size]
الشتايكر
يستخدم الفلانكوت الامارتي لكل السطع
يستخدم ربر برايمر ابو زينب كمادة عازلة لكل السطح
يستخدم الفوم السعودي ( الازرق 4سم) لكل السطح
يستخدم الكلوردين للتراب مع السطح
الماستك من نوع ابو زينب
الشتايكرة رويسية ( يعني بيها ميلان شوية من جهة احد الروؤس علمود التصليط )
-------------------------------------------------------------------------الجزء الرابع : تسلسل العمل حسب الاولوية
1- اتسوي الهيكل وياه المجاري والشبابيك اذا حديد واذا المنيوم اتسوي فريم شخاطة وهذا استندر
2- تلبخ البيت كلة - اذا قررت الواجهة نثر و حتى الستارات من الداخل والخارج
3- اتسوي السطح شتايكر - تخلص منة
4- تاسيس ماء و كهرباء دفن ( ابو المي والكهرباء تتفق وياهم على الفنش مالتهن من اتخلص بياض و ربط البيت بالوطني و المجاري والماء والصحيات )
5- اطبك السيراميك مال المطبخ والحمامات وتكمل نثر الواجهة مال البيت اذا نثر
6- اطلع المبيضجي ويكمل الشغل وصولا الى الازارات 10 سم مال البيت وتترك مبلغ بسيط ويكلك عود خابرني من تكمل الارضيات
7- اطلع ابو الارضيات يطبك البيت من فوك الى الارض مع الازارات مع الدرج
8- ترجع للمبيضجي اتكل كمل الازارات مال البيت ونقوصات البياض وية الدرج ان وجدت
9- تشتغل اهنا على التوازي
تتفق وية نجار ياخذ قياسات الابواب ويبدة يشتغلهن يمة بالمحل
تتفق وية حداد يجي يسوي اللك يدات البوب والقفالة مال البيت اذا حديد طبعا
10- تصبغ كل الحديد الموجود بالبيت
11- اتجيب ابو جام ياخذ القيسات ويكمل الجام
12- يجي ابو الكهرباء يكمل شغل التركيب الفنش كما اتفقت وياه
13 - ابو الصحيات يشدلك الخلاطات والدوش والصحيات كلها يربطك مجاري وابي همينة
تتفق وية حداد او ابو المنيوم ويسوي اللك المحجر مال الدرج
14- اطلع صباغ للبيت داخلي وخارجي اذا عندك شغل خارجي وبهذا اتكون اكملت العمل في البيت
ملاحظة : مدة العمل القياسية للبناء بيت في\ تستغرق من 5 الى 7 اشهر
[/size] | |
|
فؤاد حسني الزعبي
المراقب العام المميز
تاريخ التسجيل : 22/10/2011
العمر : 81
البلد /المدينة : فيينا - النمسا
| | موضوع: رد: بالخطوات-مراحل البناء 3/15/2015, 12:20 | |
| شكرا لك للشرح التفصيلي بالترتيب والخطوات الصحيحة لمراحل البناء | |
|
ابتسام موسى المجالي
مشرف
تاريخ التسجيل : 20/04/2010
| | موضوع: رد: بالخطوات-مراحل البناء 3/15/2015, 12:23 | |
| خطوات بكامل الدقه
شكرا لك للشرح الوافي والمفصل | |
|
بثينة الزعبي
المراقب العام المميز
تاريخ التسجيل : 18/02/2012
العمر : 68
البلد /المدينة : النمسا / فيينا
| | موضوع: رد: بالخطوات-مراحل البناء 3/15/2015, 16:14 | |
| طرح قيم وشكراً للمعلومات المفيدة مع التوضيح لكل خطوة في مراحل البناء | |
|
الرئيسية
البوابة
التسجيل
دخول
